Bashkimi Evropian duhet të gjejë një mënyrë të re për të financuar mbrojtjen e Ukrainës kundër Rusisë duke përdorur bilancet e parave të gatshme që lidhen me asetet ruse të ngrira në Evropë, tha të mërkurën kryetarja e Komisionit Evropian, Ursula von der Leyen.
Ajo tha se kapitali i aseteve nuk do të preket dhe rreziku që lidhet me financimin e ri do të duhet të ndahet kolektivisht nga vendet e BE-së.
Von der Leyen nuk dha detaje të mëtejme mbi shumat, ose se si mund të përdoren asetet e bankës qendrore ruse të bllokuara.
“Kjo është lufta e Rusisë. Dhe është Rusia që duhet të paguajë. Kjo është arsyeja pse ne duhet të punojmë urgjentisht për një zgjidhje të re për të financuar përpjekjet e luftës së Ukrainës në bazë të aseteve të bllokuara ruse”, tha Von der Leyen në një fjalim.
“Me bilancet e parave të gatshme të lidhura me këto asete ruse, ne mund t’i ofrojmë Ukrainës një kredi dëmshpërblimi. Vetë asetet nuk do të preken. Dhe rreziku do të duhet të mbahet kolektivisht”, i tha ajo Parlamentit Evropian.
Fitimet e gjeneruara nga asetet e bankës qendrore ruse prej 300 miliardë dollarësh të bllokuara në vendet e G7-së pasi Moska pushtoi Ukrainën në vitin 2022 tashmë po shkojnë në Ukrainë. G7 ra dakord për një kredi prej 50 miliardë dollarësh për Kievin që do të paguhet nga fitimet e gjeneruara nga asetet, duke e bërë në mënyrë efektive kredinë një grant, shkruan Reuters
