Rusia ka nisur evakuimin e qytetarëve të saj nga Kuba, pasi kriza e rëndë e karburantit në ishull, e shkaktuar nga bllokada amerikane e naftës, ka paralizuar furnizimin me karburant për avionët.
Autoriteti rus i aviacionit, Rosaviatsia, njoftoi se kompanitë Rossiya Airlines dhe Nordwind Airlines do të operojnë vetëm fluturime kthimi nga Havana dhe Varadero drejt Moskës, për të riatdhesuar turistët rusë. Sipas Shoqatës së Operatorëve Turistikë të Rusisë, rreth 5 mijë shtetas rusë ndodhen aktualisht në Kubë.
Ministria ruse e Zhvillimit Ekonomik u ka bërë thirrje qytetarëve të shmangin udhëtimet drejt Kubës, ndërsa ambasada ruse në Havana po koordinon me Aeroflot dhe autoritetet kubane për kthimin e sigurt të pasagjerëve. Mediat ruse raportojnë gjithashtu se Moska planifikon të dërgojë ndihma humanitare me naftë dhe produkte të naftës.
Kriza energjetike në Kubë është përkeqësuar pas sanksioneve të reja të SHBA-së dhe ndërprerjes së furnizimeve me naftë nga Venezuela. Vendi, që prodhon vetëm një të tretën e nevojave të tij për karburant, po përballet me ndërprerje të gjera të energjisë elektrike, reduktime në transportin publik dhe kufizime në shkolla e institucione publike.
