Seanca konstituive e 8 gushtit nuk rezultoi me konstituimin e Kuvendit të Kosovës, pasi kryeministri në detyrë, Albin Kurti, kërkoi kohë shtesë për arritjen e një marrëveshjeje politike që do të përfshinte edhe çështjen e presidentit.
Gjatë seancës pati edhe tensione, ku deputetja e Aleancës, Time Kadrijaj, hodhi vezë në drejtim të Kurtit.
Ish-gjyqtari i Gjykatës Kushtetuese, Kadri Kryeziu, ka vlerësuar se afati 30-ditor për konstituimin e Kuvendit tashmë ka kaluar dhe se veprimet e mëtejshme të deputetëve zhvillohen jashtë afatit kushtetues.
“30 ditë parasheh Kushtetuta të konstituohet Parlamenti”, deklaroi Kryeziu, duke iu referuar edhe aktgjykimit të Gjykatës Kushtetuese të vitit 2025.
Ndërkaq, njohësi i çështjeve kushtetuese Mazllum Baraliu ka kritikuar klasën politike për mosarritjen e një marrëveshjeje, duke kërkuar që partitë t’i japin fund përplasjeve dhe të gjejnë një zgjidhje për funksionalizimin e institucioneve.
Ende nuk dihet se kur do të vazhdojë seanca konstituive dhe nëse negociatat politike do të prodhojnë një marrëveshje për krijimin e institucioneve të reja.
/Demantim News/
