Kryetari i LDK-së, Lumir Abdixhiku ka pritur sot në takim emisarin e BE-së për dialogun Kosovë-Serbi, Peter Sorensen.
Nëpërmjet një postimi në Facebook, Abdixhiku deklaroi se me Sorensenin diskutoi për situatën aktuale politike në vend dhe për proceset ndërkombëtare që e presin Kosovën.
Ai shton se në këtë takim theksoi rëndësinë e stabilitetit institucional dhe konsolidimit demokratik në vend, si parakushte për funksionimin normal të institucioneve, për besimin e qytetarëve te shteti, për zhvillimin ekonomik, për tërheqjen e investimeve dhe për ruajtjen e kredibilitetit ndërkombëtar të Kosovës.
“Në përmbyllje të takimit, shpreha pritjen që Bashkimi Evropian të vazhdojë angazhimin dhe mbështetjen për Kosovën, si në proceset e përgjithshme politike, ashtu edhe në rrugëtimin e saj drejt integrimit evropian dhe forcimit të perspektivës euroatlantike të vendit”, ka shkruar kreu i LDK-së.
Ndërkaq, gjatë ditës së sotme, përfaqësuesi i posaçëm i BE-së për dialogun Kosovë-Serbi, u takua edhe me presidenten Vjosa Osmani, kryeministrin në detyrë, Albin Kurti dhe kreun e PDK-së, Bedri Hamzën.
