Asociacioni i Gazetarëve të Kosovës (AGK) ka thënë se Faton Peci, kandidati për kryetar të Lëvizjes Vetëvendosje në Mitrovicën e Jugut, ka bërë fushatë të rëndë intimiduese ndaj televizionit TV Dukagjini.
AGK, në reagimin e saj, thekson se Peci ka vazhduar “sulmet e ulëta dhe të papranueshme” kundër TV Dukagjinit, nëpërmjet një postimi në rrjetet e tij sociale.
“Duke iu kthyer Exit-Poll-it të 12 tetorit, Peci e ka quajtur, mes tjerash, TV Dukagjinin si ‘qendra operative e ndërmarrjes kriminale’”.
“AGK-ja e konsideron komunikimin e Pecit si thellësisht të papërgjegjshëm, dhe akuzë me potencial shumë të rrezikshëm. Është e papranueshme që një politikan si zoti Peci të japë kualifikime kaq të rënda për një media, në kuadër të betejës politike të tij dhe të partisë që përfaqëson”, thuhet në reagim.
AGK-ja kërkon nga Peci dhe Vetëvendosje që urgjentisht të tërheqin akuzat publike ndaj televizionit dhe gazetarëve, pasi sipas këtij mekanizmi, këto deklarata shërbejnë si nxitje për sulme të vazhdueshme ndaj tyre.
“Ambienti i mediave për të bërë punën e tyre është vështirësuar shumë për shkak të retorikës së papranueshme si kjo e zotit Peci”, theksohet nga AGK.
Sipas AGK-së, mediat duhet të lihen të lira të raportojnë në të gjitha fazat e procesit zgjedhor.
