Profesori universitar Mazllum Baraliu, ka komentuar zhvillimet e fundit politike rreth krijimit të Qeverisë së Kosovës.
Ai ka thënë se partitë e mëdha opozitare duhet t’ia votojë qeverinë partisë fituese edhe pa marrëveshje politike, në mënyrë që të mos bllokohen institucionet.
“Partia fituese është e interesuar për formimin e Qeverisë. Fatkeqësisht bisedat e partive politike tek ne bëhen nëpër kafene dhe koalicionet edhe më parë kështu janë bërë. Pres që të merren vesh me dikë, ose me ndonjë deputet, sepse i duhen vetëm katër vota”, ka thënë Baraliu.
Sipas tij, një vendim strategjik dhe i mençur i partive të mëdha opozitare do të ishte ta votojnë qeverinë pa ndonjë kompromis politik.
“Le ta fusin në sprovë Kurtin, nëse është i zoti t’i çojë proceset përpara, nëse jo do të bie vet në provim. Kështu respektohet vota e qytetarit dhe interesi publik për formimin e institucioneve”, ka thënë Baraliu.
Sidoqoftë, ai vlerëson se edhe nëse nuk i ka votat, Albin Kurti do të provojë formimin i Qeverisë.
Nga ana tjetër, profesori ka komentuar edhe dërgimin e lëndës në Gjykatën Kushtetuese nga Lista Serbe, pas zgjedhjes së Nenad Rashiqit nënkryetar i Kuvendit.
Sipas Baraliut, Gjykata Kushtetuese duhet ta refuzojë kërkesën e Listës Serbe si të papranueshme.
“Kuvendi është konstituuar, mandatar është caktuar për qeverinë e re dhe duhet respektuar afatet kushtetuese. Refuzimi i kërkesës do të ishte vendimi më i drejtë, sepse Lista Serbe, me vet faktin që ka kërkuar masë mbrojtëse, është e interesuar ta bllokojë dhe zvarrisë procesin e formimit të institucioneve”, ka thënë Baraliu.
