Kryetari i PDK-së, Bedri Hamza, ka kritikuar ashpër Lëvizjen Vetëvendosje dhe kryeministrin në detyrë, Albin Kurti, duke i akuzuar për zvarritje të konstituimit të Kuvendit dhe shkelje të Kushtetutës.
Në një deklaratë para mediave në Kuvend, Hamza tha se afati për konstituimin e këtij institucioni nuk është përcaktuar nga partitë politike, por nga Kushtetuta dhe vendimi i Gjykatës Kushtetuese.
“Jo një afat të vendosur nga PDK-ja, jo nga opozita, por nga Kushtetuta e Republikës së Kosovës, të cilën tashmë e kanë suspenduar”, deklaroi Hamza.
Sipas tij, Kosova tashmë ndodhet përballë një krize jo vetëm politike, por edhe kushtetuese e institucionale, pasi Kuvendi ende nuk është konstituuar dhe vendi nuk ka një qeveri të re me mandat.
Hamza ka akuzuar pushtetin se po funksionon në kundërshtim me rregullat kushtetuese dhe procedurat e Kuvendit.
“Shteti nuk është Albin Kurti. Shteti është Kushtetuta, janë ligjet, janë institucionet dhe kufijtë që askush nuk ka të drejtë t’i kalojë”, tha ai.
Kreu i PDK-së theksoi se Vetëvendosje ka të drejtë të propozojë kandidatin për kryetar të Kuvendit, por sipas tij, nuk mund ta ndalë procesin kushtetues.
Ai kritikoi edhe ushtruesin e detyrës së kryetarit të Kuvendit, Avni Deharin, duke pretenduar se nuk mund ta interpretojë Kushtetutën në bazë të interesave partiake.
Hamza paralajmëroi se shkeljet e Kushtetutës nuk duhet të shndërrohen në precedent politik.
“Nuk ka mandat politik mbi Kushtetutën. Nuk ka shumicë mbi Kushtetutën. Nuk ka individ mbi Kushtetutën”, u shpreh ai.
Në fund, Hamza i bëri thirrje Vetëvendosjes që të ndërmarrë hapat e nevojshëm për konstituimin e Kuvendit dhe kthimin e institucioneve në atë që ai e quajti “binarët kushtetues”.
