Kompania amerikane e veturave autonome, Waymo, ka tërhequr 3,791 auto-taksi që përdorin teknologjinë e vozitjes autonome pasi një defekt në softuer ka bërë që disa vetura të dalin nëpër rrugë të përmbytura, sipas një raporti tërheqjeje nga Shoqata Kombëtare e Sigurisë së Trafikut në Autostrada (NHTSA).
Tërheqja vullnetare e paraqitur më 30 prill prek automjetet Waymo që operojnë me Sistemin e Automatizuar të Drejtimit të gjeneratës së pestë dhe të gjashtë të kompanisë. Softueri “mund të lejojë që automjeti të ngadalësohet dhe më pas të futet në ujë nëpër rrugë me shpejtësi më të lartë”, tha një raport i NHTSA-së, raporton “GovTech“.
“Hyrja në një rrugë të përmbytur mund të shkaktojë humbje të kontrollit të automjetit, duke rritur rrezikun e një aksidenti ose lëndimi”, tha NHTSA.
Tërheqja pasoi motin e keq në San Antonio, gjatë të cilit një veturë Waymo hyri në një rrugë të përmbytur dhe të pakalueshme, tha kompania.
Në përgjigje, Waymo ka rritur kufizimet e lidhura me motin në automjetet e saj dhe thotë se po punon për mbrojtje shtesë të softuerit.
Waymo operon në 10 qytete të mëdha në ShBA dhe, edhe në të kaluarën ka lëshuar urdhra për tërheqje të automjeteve në lidhje me sigurinë. Vitin e kaluar, kompania tërhoqi më shumë se 1,200 automjete autonome pas aksidenteve të vogla që përfshinin pengesa në rrugë.
Kompania në pronësi të “Alphabet” është kritikuar gjithashtu për incidente sigurie, duke përfshirë goditjen e një fëmije jashtë një shkolle në Santa Monica në fillim të këtij viti dhe goditjen fatale të një mace lagjeje në San Francisko.
Megjithatë, sipas të dhënave të mbledhura nga Waymo nga mbi 170 milionë milje të përshkuara plotësisht autonome, kompania thotë se është 13 herë më e sigurt se shoferët njerëzorë në aksidente që përfshijnë këmbësorë.
Kompania me seli në Mountain View është aktualisht përpara në garën për të shpërndarë robotaksinë në të gjithë vendin.
Konkurrentët Zoox dhe Tesla po përpiqen të arrijnë teknologjinë e tyre të vetë-drejtimit, por ende nuk kanë arritur shkallën dhe shtrirjen e Waymo-s.
Sipas NHSTA, të gjitha automjetet e prekura Waymo morën një përditësim të përkohshëm të softuerit për të zbutur problemin, por një zgjidhje e plotë për tërheqjen është ende në zhvillim e sipër.
