Departamenti Amerikan i Sigurisë Kombëtare (DHS) rrezikon të mbetet pa financim javën e ardhshme, pasi demokratët po kërkojnë reforma të thella në operacionet e zbatimit të ligjit për emigracionin, ndërsa republikanët i kanë hedhur poshtë këto kërkesa.
Demokratët kanë vendosur kushte për miratimin e buxhetit të DHS-së, duke u fokusuar te praktikat e ICE dhe CBP, pas akuzave për shkelje të të drejtave civile gjatë goditjes së emigracionit nën administratën e presidentit Donald Trump, raporton “Al Jazeera”.
Mes 10 kërkesave kryesore të demokratëve janë ndalimi i agjentëve të maskuar, detyrimi për identifikim të qartë, përdorimi i kamerave trupore, kufizimi i përdorimit të forcës, ndalimi i profilizimit racor dhe hyrja në banesa vetëm me urdhër gjykate.
Republikanët, përfshirë udhëheqësin e shumicës në Senat John Thune, i cilësuan kërkesat jorealiste dhe paralajmëruan se ndarja e financimit do të nënkuptonte çfinancim të zbatimit të ligjit.
Senati duhet të miratojë financimin e DHS-së deri më 13 shkurt, përndryshe agjencia rrezikon mbyllje të përkohshme, duke prekur edhe shërbime të tjera si FEMA dhe TSA.
Negociatat mbeten në ngërç, ndërsa demokratët nuk përjashtojnë masa të mëtejshme politike nëse nuk arrihet kompromis.
