Është konfiskuar në Prizren një veturë e tipit BMW XM me targa të Zvicrës, drejtuesi i së cilës ka qenë nën masën e ndalesës.
Policia ka bërë të ditur se të njëjtit i i është shqiptuar gjobë prej 500 euro dhe masë ndalese shtesë prej gjashtë muajsh, përcjell Klankosova.tv.
Në njoftim gjithashtu thuhet se drejtuesi ka të evidentuara 114 gjoba, prej të cilave 18 vetëm në dy vitet e fundit.
“Më datë 15.10.2025, rreth orës 12:31, patrulla e Njësisë Rajonale të Trafikut Rrugor (NJRTRR) në Prizren, përmes radarit mobil, ka identifikuar kundërvajtjen e shkaktuar nga drejtuesi i veturës BMW XM me targa zvicerane, i cili ka qarkulluar me 77 km/h në zonën me kufizim prej 50 km/h”.
“Pas verifikimit të dokumentacionit, është konstatuar se drejtuesi ka qenë nën masën e ndalesës për drejtimin e mjetit motorik. Si pasojë, patrulla ka konfiskuar automjetin në bazë të nenit 246, paragrafi 5 dhe l të Ligjit për Trafikun Rrugor, si dhe i është shqiptuar gjobë prej 500 euro dhe masë ndalese shtesë prej 6 muajsh. Duke qenë se kundërvajtësi është me nënshtëtësi zvicerane, do të zbatohen procedurat për njoftimin e autoriteteve zvicerane lidhur me ndalesën për drejtimin e mjetit motorik”.
“Nga të dhënat në sistemin SIPK, rezulton se personi në fjalë ka të evidentuara 114 gjoba, prej të cilave 18 vetëm në dy vitet e fundit, ku 3 prej tyre lidhen me nenin 246 paragrafi 5 – drejtim i mjetit motorik nën masën e ndalesës”, thuhet tutje në njoftim.
