Presidenti turk, Recep Tayyip Erdogan, ka kritikuar ndërprerjen e flotës humanitare Global Sumud nga Izraeli, duke e quajtur këtë veprim “banditizëm” dhe një akt brutal ndaj civilëve që shpërndajnë ndihma humanitare.
Erdogan ka theksuar se flota ka “ekspozuar” edhe një herë politikat e dhunshme të Izraelit.
Aktivistët kanë bërë me dije të mërkurën se marina izraelite ka kapur të paktën 19 anije të flotës ndërsa ato i afroheshin bregut të Gazës. Flota përbëhej nga rreth 50 anije dhe 500 aktivistë dhe mbante ndihma simbolike humanitare.
Organizatorët kanë njoftuar se anijet Sirius, Alma dhe Adara u kapën rreth 70 milje detare nga bregu i Gazës. Autoritetet izraelite kanë bërë të ditur se aktivistët në bord, përfshirë Greta Thunberg, janë të sigurt dhe po transferoheshin në Izrael.
Grupi, i cili përfshin nipin e Nelson Mandelës, Mandla Mandela, ish-kryetaren e bashkisë së Barcelonës, Ada Colau, dhe disa ligjvënës evropianë, ka deklaruar se mbetet i palëkundur në misionin e tij për të thyer bllokadën izraelite dhe për të shpërndarë ndihma për palestinezët.
