Leon Goretzka mund të jetë një nga goditjet e bujshme të Milanit në merkaton e ardhshme verore.
Sipas asaj që raporton Gianluca Di Marzio, kuqezinjtë po ndjekin me shumë vëmendje situatën e mesfushorit gjerman, i cili pritet të largohet nga Bayern Munich në fund të sezonit si lojtar i lirë.
Kontrata e Goretzkës me klubin bavarez po shkon drejt përfundimit dhe, në këto kushte, Milani po studion mundësinë për ta afruar pa paguar karton.
Një operacion që do të ishte shumë interesant për drejtuesit kuqezi, të cilët synojnë të forcojnë mesfushën me një profil me eksperiencë të madhe ndërkombëtare dhe cilësi fizike e taktike.
Milani e sheh Goretzkën si një përforcim ideal për të rritur nivelin dhe alternativat në mesin e fushës, sidomos në funksion të objektivave në Serie A dhe në arenën evropiane.
Lojtari, nga ana e tij, po vlerëson me kujdes të ardhmen, ndërsa ideja e një aventure të re jashtë Gjermanisë nuk përjashtohet.
Për momentin bëhet fjalë për kontakte dhe vlerësime paraprake, por pista është reale dhe mund të konkretizohet gjatë verës. Milani është në pritje, gati të shfrytëzojë një mundësi që tregu mund t’ia ofrojë pa kosto transferimi.
