Kandidati për kryeministër nga Partia Demokratike e Kosovës, Bedri Hamza, është takuar me ambasadorin e ri të Gjermanisë në Kosovë, Rainer Rudolph, të cilit i ka uruar mirëseardhje.
Përmes një postimi në Facebook, Hamza ka bërë të ditur se gjatë takimit e ka njoftuar ambasadorin për përgatitjet që po bëhen për zgjedhjet e 28 dhjetorit, si dhe për gatishmërinë e tij për formimin e institucioneve të reja pas zgjedhjeve.
“Ambasadorit të ri gjerman, Rainer Rudolph, i urova mirëseardhje në Kosovë dhe e njoftova për përgatitjet për zgjedhjet e ardhshme, si dhe për gatishmërinë time për t’i formuar institucionet e reja sa më shpejt”, ka shkruar Hamza.
Ai njëherësh njoftoi se gjatë bisedës ka kërkuar nga partnerët ndërkombëtarë përkrahje më të madhe për Kosovën, përfshirë heqjen e sanksioneve të Bashkimit Evropian.
“Në takimin tonë theksova se nga partnerët ndërkombëtarë presim përkrahje në skenën ndërkombëtare, me heqjen e sanksioneve të BE-së, mbështetjen për anëtarësimin në Këshillin e Evropës dhe marrjen e statusit të vendit kandidat për BE. Kosova ka vetëm një drejtim përpara: rrugën euroatlantike”, ka shkruar Hamza.
