Instituti Hidrometeorologjik i Kosovës ka njoftuar se në disa rajone të vendit janë zhvilluar vranësira konvektive, të cilat mund të sjellin reshje lokale shiu, shkarkesa elektrike, erëra të fuqishme dhe, në disa zona, edhe breshër.
Sipas IHMK-së, temperaturat kanë arritur rreth 32°C, ndërsa paqëndrueshmëria atmosferike pritet të vazhdojë edhe gjatë orëve në vijim.
Instituti bën të ditur se reshjet nuk do të përfshijnë gjithë territorin e Kosovës, por do të jenë lokale dhe me intensitet të ndryshëm.
Qytetarët këshillohen të tregojnë kujdes gjatë lëvizjes në zonat ku mund të ketë stuhi, ndërsa fermerët të ndjekin njoftimet meteorologjike për shkak të rrezikut nga reshjet intensive dhe breshri.
