Policia e Kosovës ka realizuar një aksion kundër narkotikëve në Podujevë, ku është arrestuar një person i dyshuar për veprën penale “blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Sipas njoftimit të Policisë, operacioni është kryer nga hetuesit e Drejtorisë për Hetimin e Trafikimit me Narkotikë – Njësia në Prishtinë, në kuadër të Planit Operativ “Vera 2026”. Aksioni ka ardhur pas informacioneve të siguruara nga policia se një person dyshohej se ishte i përfshirë në shitblerjen e substancave narkotike.
I dyshuari është ndaluar në një lokal në qytetin e Podujevës, ku gjatë kontrollit policor janë gjetur dhe konfiskuar gjashtë paketime me një substancë që dyshohet të jetë marihuanë, si dhe prova të tjera që mund të lidhen me rastin.
Personi i arrestuar me inicialet F.S., mashkull kosovar, është intervistuar nga hetuesit policorë. Ndaj tij është hapur procedurë për veprën penale “blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Me urdhër të prokurorit kujdestar, i dyshuari është ndaluar për 48 orë, ndërsa hetimet për zbardhjen e plotë të rastit janë duke vazhduar.
