Autoritetet meksikane kanë konfirmuar se pesë nga dhjetë punonjësit e rrëmbyer muajin e kaluar nga një minierë në pronësi kanadeze në shtetin Sinaloa janë gjetur të vdekur.
Zyra e Prokurorit të Përgjithshëm njoftoi se trupat u zbuluan në zonën rurale El Verde, ndërsa po punohet për identifikimin e pesë trupave të tjerë, raporton Aljazeera.
Autoritetet kanë arrestuar katër persona në lidhje me rastin dhe kanë deklaruar se hetimet do të vazhdojnë për të zbardhur rrethanat dhe motivet e krimit. Familjarët e viktimave janë njoftuar dhe trupat do të dërgohen në shtetet përkatëse.
Kompania kanadeze Vizsla Silver, që operon minierën e arit dhe argjendit Panuco pranë Mazatlanit, shprehu tronditje për ngjarjen dhe theksoi se përparësi mbetet gjetja e punonjësve të tjerë të zhdukur. Ngjarja ndodh në një kohë përshkallëzimi të dhunës së bandave në Sinaloa, një nga shtetet më të goditura nga krimi i organizuar në Meksikë.
