Policia çeke tha të martën se kishte akuzuar katër persona dhe një person juridik të paidentifikuar për detyrimin e grave të reja për të ofruar përmbajtje erotike për llogaritë në OnlyFans dhe rrjetet e tjera sociale.
Çështja e trafikimit të qenieve njerëzore përqendrohet në një grup që rekrutoi dhjetëra gra pak mbi 18 vjeç dhe, sipas policisë, shfrytëzoi margjinalizimin ose papjekurinë dhe injorancën e tyre për të ofruar përmbajtje pa kontroll mbi përdorimin e saj.
OnlyFans është një faqe vetëm për të rritur ku njerëzit mund të shesin qasje në fotografi dhe video, duke përfshirë përmbajtje seksuale eksplicite.
Zyra e saj për media nuk iu përgjigj menjëherë një kërkese për koment, raporton Reuters.
Policia tha se pasi fitonin besimin e grave, të akuzuarit i joshën ato të krijonin përmbajtje erotike dhe të nënshkruanin kontrata për t’i përfaqësuar ato në rrjetet sociale, më shpesh OnlyFans.
“Viktimat zakonisht nuk kishin qasje në profilet e krijuara me të dhënat e tyre personale”, tha policia.
“Personat e akuzuar dyshohet se po përdornin presion psikologjik, kërcënime me gjoba ose refuzim pagesash për të kërkuar gradualisht, dhe kundër vullnetit të lirë të viktimave, përmbajtje më eksplicite…”, tha policia.
