Të paktën 17 persona janë vrarë, mes tyre nxënëse, mësues dhe punonjës shëndetësorë, pas një sulmi me dron të kryer nga Forcat e Mbështetjes së Shpejtë ndaj një shkolle të mesme dhe një qendre shëndetësore në shtetin White Nile të Sudanit.
Sipas Rrjetit të Mjekëve Sudanezë, sulmi ndodhi në fshatin Shukeiri dhe plagosi edhe 10 persona të tjerë. Drejtori i spitalit al-Duwaim, Musa al-Majri, konfirmoi se viktimat u dërguan në këtë institucion, që është spitali më i afërt i madh në zonë.
Rrjeti i mjekëve e cilësoi sulmin si një krim të tmerrshëm, duke thënë se ai është pjesë e një serie sulmesh ndaj objekteve civile në rajon, përfshirë konvikte studentore, një stacion energjie dhe lagje banimi.
Sudani është përfshirë nga një luftë civile prej afro tre vitesh mes ushtrisë sudaneze dhe forcave paraushtarake RSF. Sipas Kombeve të Bashkuara, konflikti ka shkaktuar mijëra viktima dhe ka detyruar rreth 12 milionë njerëz të largohen nga shtëpitë e tyre, ndërsa mbi 21 milionë përballen me mungesë të theksuar ushqimi.
