Vjosa Osmani tha sot se shpreson që vendi të ketë qeveri me mandat të plotë kushtetues, pasi sipas saj, qeveria në detyrë ka kompetenca të limituara.
“Ju e dini që përkundër angazhimit tim të vazhdueshëm që të kemi konstituim të Kuvendit, ajo çështje është varur kryekëput nga vullneti i partive politike dhe deputetëve të Kuvendit, por më në fund edhe ai proces u përmbyll. Kemi Kuvend plotësisht të konstituar dhe pas asaj unë menjëherë të nesërmen kam mandatuar kryeministrin në detyrë, i cili është nominuar nga partia e parë që ka dal nga zgjedhjet”, tha ajo.
“Nga data që është nominuar janë 15 ditë dhe natyrisht që afatet rrjedhin, mirëpo negociatat për koalicione bëhen vetëm në mes partive apo në rastin konkret mund të bëhen edhe me deputetë, por janë diskutime mes partive politike në të cilat unë si presidente nuk do të duhej të ndërhyja. Rrjedhimisht edhe unë nuk mund ta di se deri ku kanë arritur ato negociata potencialisht, por janë çështje që besoj se më shumë informata mund t’iu japin partitë politike të involvuara”, tha Osmani.
