Ministri në detyrë i Financave, Hekuran Murati, në konferencën për media pas mbledhjes së Qeverisë, uroi fillimisht Ditën e Forcës.
Në fjalën e tij, ai tha se qeveria në detyrë nuk është kursyer asnjëherë kur ka ardhur puna për ndarjen e buxhetit dhe për mbështetjen e ushtrisë.
“Mund ta them me krenari, se si qeveri nuk kemi kursyer asnjëherë kur ka ardhur puna për ndarjen e buxhetit dhe për mbështetjen e ushtrisë tonë, e që po besoj që me hapa shumë të shpejtë po merr formën e një ushtrie moderne, ndoshta më modernes në rajon”, u shpreh Murati.
Ai përmendi edhe ndarjen e mjeteve nga kategoria e kursimeve për punëtorët e RTK-së, për të cilin veprim tha se ishte improvizim i detyruar, teksa fajin ia la ish-opozitës për mosthemelimin e Komisionit të Buxhetit.
“Për pagat e transmetuesit publik, RTK, erdhi si zgjidhje emergjente, pra improvizim i detyruar për shkak të mungesës së zgjidhjes nga organi adekuat, në këtë rast Kuvendi, sepse partitë opozitare refuzuan kategorikisht që ta themelonin Komisionin për Buxhet”, u shpreh ai.
Ai shtoi se ndarja e mjeteve për RTK-në u bë sot, pasi sipas tij, është pritur që këtë detyrim ta kryejë Kuvendi i Kosovës, i cili tashmë është shpërndarë pas dështimit të VV-së për të formuar Qeverinë.
