Zvicra do të aplikojë rregulla më të rrepta për vendosjen e kufizimit të shpejtësisë prej 30 km/h në akset kryesore të trafikut.
Ndryshimet në rregulloren federale të sinjalizimit do të hyjnë në fuqi më 1 tetor 2026, ndërsa qytetet dhe komunat do të duhet të paraqesin paraprakisht një vlerësim profesional para se të vendosin një kufizim të tillë.
Sipas rregullave të reja, autoritetet lokale duhet të dëshmojnë se ulja e shpejtësisë në rrugët kryesore nuk do ta zhvendosë trafikun drejt lagjeve të banimit.
Megjithatë, kufizimi 30 km/h nuk ndalohet plotësisht. Ai do të mund të zbatohet për arsye sigurie, përmirësim të cilësisë së jetës apo mbrojtje nga ndikimet mjedisore.
Rregullat për rrugët brenda lagjeve të banimit mbeten të pandryshuara dhe në këto zona nuk kërkohet ekspertizë paraprake.
Ndryshime do të ketë edhe në përparësinë në kryqëzime. Në rrugët kryesore me kufizim 30 km/h, në parim nuk do të vlejë përparësia nga e djathta, me qëllim ruajtjen e rrjedhës së trafikut.
Vendimi ka marrë reagime të përziera, ndërsa përfaqësuesit e qyteteve dhe komunave e konsiderojnë kërkesën për ekspertizë si një barrë administrative shtesë.
/Demantim News/
