Kryeministri i Shqipërisë, Edi Rama, ka lëshuar paralajmërime të forta ndaj personave që kanë marrë pjesë në aktet e dhunës gjatë protestave, duke deklaruar se autoritetet do të punojnë për identifikimin e tyre, edhe kur janë të maskuar.
Gjatë një takimi me drejtuesit e bankave të nivelit të dytë, Rama tha se sulmet ndaj degëve bankare dhe bankomatëve kishin për qëllim krijimin e panikut dhe kaosit në sistemin financiar të vendit.
Sipas tij, personat që kanë përdorur gurë dhe zjarr për të sulmuar bankat kanë vepruar me synimin për të nxitur frikë te qytetarët, ndërsa paralajmëroi se identifikimi i tyre do të bëhet përmes investimeve në teknologji.
“Ata me kapuçë do t’i dallojmë dhe do t’i ndjekim këmba-këmbës”, u shpreh Rama, duke shtuar se personat që përfshihen në akte dhune duhet të tërhiqen menjëherë.
Rama paralajmëron masa të ashpra: Fatura e dhunës do t’u shkojë familjeve
Kreu i qeverisë deklaroi se Shqipëria mund të ndjekë shembujt e Italisë dhe Francës për të vendosur përgjegjësi financiare ndaj familjeve për dëmet e shkaktuara nga të miturit.
Ai bëri të ditur gjithashtu se po shqyrtohen masa shtesë ndaj personave që përfshihen në akte të dhunshme, përfshirë krijimin e një regjistri të veçantë për ta dhe kufizime në përdorimin e mjeteve të transportit.
Rama tha se bashkëpunimi me vendet e Bashkimit Evropian ka nisur edhe për shqyrtimin e mundësisë së kufizimit të udhëtimit për personat e përfshirë në dhunë.
Sulmet ndaj bankave, Rama: Synuan të krijonin panik
Gjatë fjalës së tij, kryeministri u ndal edhe te sulmet ndaj bankomatëve, duke deklaruar se autorët kishin tentuar të shkaktonin pasiguri rreth funksionimit të sistemit bankar.
Ai theksoi se ekonomia nuk mund të zhvillohet përmes dhunës dhe akteve shkatërruese, ndërsa vlerësoi ecurinë ekonomike të Shqipërisë dhe ritmet e rritjes në raport me vendet e rajonit.
Sipas Ramës, bankomatet e dëmtuara do të rikthehen sa më shpejt në funksion, ndërsa identifikimi i personave përgjegjës do të jetë një nga prioritetet e autoriteteve.
Rama sulmon pedagogët protestues: “Janë flamurtarë partie”
Kryeministri komentoi edhe pjesëmarrjen e pedagogëve në protesta, duke i akuzuar disa prej tyre se po veprojnë si përfaqësues politikë dhe jo si pjesë e një lëvizjeje të pavarur akademike.
Rama krahasoi protestat e tanishme me lëvizjen studentore të vitit 2018, të cilën e cilësoi si një shembull të dialogut dhe përballjes së argumenteve.
Sipas tij, protestat duhet të zhvillohen përmes diskutimit dhe shkëmbimit të ideve, ndërsa dënoi aktet e dhunës dhe dëmtimin e pronës publike.
“Dhuna nuk ka vend në Shqipëri”, ishte mesazhi i kryeministrit, i cili përsëriti se personat përgjegjës për shkatërrimet do të përballen me pasoja.
