Deputetja e Aleancës për Ardhmërinë e Kosovës (AAK), Teuta Haxhiu, e ka cilësuar joserioze kërkesën e Partisë Demokratike të Kosovës (PDK) për rikthimin në Kuvend të Ligjit për Dhomat e Specializuara dhe Zyrën e Prokurorit të Specializuar.
Duke folur në emisionin “FIVE” të TV Dukagjinit, Haxhiu ka theksuar se ligji tashmë është miratuar me dy të tretat e votave të deputetëve, ndërsa, sipas saj, prioritet duhet të jetë përgatitja për procesin e apelit për ish-krerët e Ushtrisë Çlirimtare të Kosovës që po gjykohen në Hagë.
“Për mua kjo është temë joserioze. Jo veç që është votuar ky ligj me dy të tretat e votave në Kuvend, mirëpo kemi përpara një proces deri në Apel të çlirimtarëve në Hagë. Ka shumë punë për të bërë”, ka deklaruar Haxhiu.
Ajo ka bërë të ditur se AAK-ja ka kontribuar në këtë proces dhe do të vazhdojë angazhimin e saj, duke përmendur edhe përfaqësimin e partisë në ekipin punues të krijuar për këtë çështje.
Haxhiu kërkon fokus te mbështetja për procesin e apelit
Sipas deputetes së AAK-së, institucionet e Kosovës duhet të përqendrohen në sigurimin e mjeteve financiare, mbështetjes juridike dhe të gjitha burimeve të nevojshme për procesin gjyqësor në Hagë.
Ajo ka vlerësuar se rikthimi i ligjit në këtë fazë nuk është qasje serioze, duke theksuar se përmirësimet dhe diskutimet e tilla është dashur të trajtoheshin gjatë shqyrtimit në Kuvend.
“Mirëpo kthimi prapa nuk është serioz. Megjithatë duhet të japim maksimumin për një punë edhe në ekipin punues që është formuar. Por, mbi të gjitha, si shtet duhet të punohet shumë deri në Apel, me financa, me mbështetje juridike e gjithçka që kërkohet prej shtetit”, ka thënë ajo.
Deklaratat e Haxhiut vijnë pas kërkesës së PDK-së drejtuar Presidentes së Kosovës për kthimin e Ligjit për Dhomat e Specializuara në Kuvend për rishqyrtim, me arsyetimin se disa dispozita duhet të plotësohen dhe të përmirësohen përpara hyrjes së tij në fuqi.
