Sëmundjet e zemrës nuk po i prekin më vetëm moshat e vjetra, por dukshëm edhe të rinjtë në vend, dhe kjo ndodh më shpesh te burrat.
Kështu ka treguar kardiologu invaziv, Daut Gorani, i cili ka theksuar se jeta dinamike, stresi, duhanpirja, konsumi i drogave dhe kequshqyerja janë disa nga faktorët kryesorë.
“Përpara kemi pasur më shumë raste me infarkte dhe sindroma akute koronare te personat e moshuar, ndërsa tash kemi mjaft edhe te të rinjtë për shkak të jetës dinamike, stresit, duhanpirjes, konsumit të drogave dhe kequshqyerjes. Madje edhe paraqitja e diabetit në mosha të hershme”.
Ndër të tjera, kardiologu tregoi se vdekja e papritur e Shpat Kasapit nga sulmi në zemër ka alarmuar shumë të rinjtë dhe për këtë arsye ata kanë filluar të bëjnë kontrolle më të shpeshta.
“Së fundmi, vdekja e yllit të madh Shpat Kasapi ka alarmuar shumë të rinjtë dhe është vërejtur dukshëm se vetëdijesimi tek ata ka filluar, duke i shtyrë të bëjnë kontrolle të shpeshta”, theksoi Gorani.
