Kryetari i Sindikatës së Trafikut Urban, Elmi Gashi, po kërkon ndërhyrje të menjëhershme nga kryetari i Prishtinës, Përparim Rama.
Gjatë protestës para Komunës, Gashi tha se punëtorët po kërkojnë vetëm pagat dhe rimbursimin e dëmeve të shkaktuara ndër vite.
“E kemi një kërkesë të vetme, që në bashkëpunim me punëtorët, t’i ndihmoni si fëmijët tuaj. Derisa jeni i mandatuar si kryetar i Komunës, ne kemi ardhur të kërkojmë pagat tona, rimbursimin e dëmeve që na janë shkaktuar”, deklaroi ai.
Sipas Gashit, borxhet e Trafikut Urban janë të shumta, dhe kërkohet zgjidhje.
“3 milionë e 220 mijë euro janë borxhet që Komuna ia ka Trafikut Urban. 1 milion e 600 mijë euro ia kemi borxh furnitorëve tanë. Nuk ka para për t’i shërbyer qytetarëve, nuk ka naftë, nuk ka paga. Punëtorët janë të diskriminuar. I lutem kryetarit dhe kujtdo tjetër që të dalë e të na presë këtu. Mos ta politizojmë këtë çështje, është çështje mbijetese për Trafikun Urban dhe shërbimin ndaj rreth 60 mijë pasagjerëve në ditë”.
