Presidenti i Këshillit Evropian, Antonio Costa, u zotua të hënën se Bashkimi Evropian do të vazhdojë të mbështesë Ukrainën, ndërsa përshëndeti “momentumin e ri” në negociatat e paqes për t’i dhënë fund luftës së shkaktuar nga pushtimi i Rusisë.
“Bashkimi Evropian është i përkushtuar të vazhdojë t’i ofrojë Presidentit Zelenskiy gjithë mbështetjen që i nevojitet, mbështetje diplomatike, mbështetje ushtarake, mbështetje ekonomike”, u tha ai gazetarëve në kryeqytetin e Angolës, Luanda, pasi kryesoi një takim të liderëve të BE-së mbi Ukrainën në kuadër të një samiti me Bashkimin Afrikan.
“Kjo ka të bëjë në veçanti me mbështetjen financiare për Ukrainën”, shtoi Costa, duke kujtuar se udhëheqësit e BE-së ranë dakord muajin e kaluar për të mbuluar nevojat financiare të Ukrainës për dy vitet e ardhshme.
