Kryeministri i Britanisë, Sir Keir Starmer, ka deklaruar se Kina paraqet kërcënime reale për sigurinë kombëtare të Mbretërisë së Bashkuar, ndërsa ka sulmuar politikanët që vazhdojnë të përdorin Brexit-in si model për politikën e jashtme.
Starmer mbajti një nga fjalimet më të rëndësishme të vitit për politikën e jashtme gjatë ceremonisë në Guildhall të Londrës, ku theksoi se premtimet e bëra gjatë referendumit për Brexit ishin të gabuara dhe se vendi ende po përballet me pasojat.
Kryeministri tha se do të ishte plotësisht i papërgjegjshëm të merrej Brexit-i si model për politikat e ardhshme ndërkombëtare. Ai kritikoi disa figura politike, si Kemi Badenoch, Nigel Farage dhe Zack Polanski, të cilët kërkojnë largimin nga Konventa Evropiane për të Drejtat e Njeriut ose madje nga NATO.
Sipas Starmer, këto ide përfaqësojnë “një vizion të dobët të Britanisë”, që nxit pakënaqësi në vend që të ofrojë shpresë.
Megjithëse ka qenë kundër Brexit-it më herët, ai tha se vota e vitit 2016 “ishte shprehje demokratike që duhet respektuar”.
Në fjalimin e tij, Starmer paralajmëroi se Britania ka nevojë për një politikë të qartë dhe realiste ndaj Kinës.
Çështja e Kinës është bërë temë e nxehtë në Londër pas akuzave për spiunazh në parlament dhe polemikave mbi projektin e një ambasade të madhe kineze në qendër të kryeqytetit.
Starmer u shpreh se do të vizitojë Kinën vitin e ardhshëm, duke thënë se mospërfshirja me ekonominë e dytë më të madhe në botë do të ishte e pakuptimtë dhe neglizhencë ndaj detyrës.
Kryeministri theksoi se siguria kombëtare nuk negociohet, por se vendi duhet të ruajë kanale bashkëpunimi me Pekinin, sidomos në fushat ekonomike.
