Presidenti i ShBA-së, Donald Trump, thotë se Irani ka propozuar negociata pas kërcënimit të tij për të goditur Republikën Islamike, ndërsa një shtypje e vazhdueshme ndaj demonstruesve ka çuar në qindra vdekje.
Trump tha të dielën vonë se administrata e tij ishte në bisedime për të caktuar një takim me Teheranin, por paralajmëroi se ai mund të duhet të veprojë i pari, ndërsa raportet shtohen për rritjen e vdekjeve dhe qeveria vazhdon të arrestojë protestuesit.
Agjencia e Lajmeve të Aktivistëve të të Drejtave të Njeriut me seli në ShBA, e cila ka raportuar me saktësi mbi trazirat e kaluara në Iran, dha numrin e të vdekurve. Ajo tha se të paktën 544 persona janë vrarë deri më tani, përfshirë 496 protestues dhe 48 persona nga forcat e sigurisë. Agjencia shtoi se më shumë se 10,600 persona janë arrestuar gjithashtu gjatë dy javëve të protestave.
Ndërkohë, ministri i Jashtëm i Iranit, Abbas Araghchi deklaroi të hënën se “situata është vënë nën kontroll të plotë” pas një shtypjeje të përgjakshme të protestave mbarëkombëtare në vend.
Abbas Araghchi nuk ofroi prova për pretendimin e tij.
Araghchi foli me diplomatë të huaj në Teheran. Rrjeti satelitor i lajmeve Al Jazeera i financuar nga Katari, i cili është lejuar të funksionojë pavarësisht ndërprerjes së internetit në vend, i transmetoi komentet e tij.
