Sot në Gjykatën Themelore po vazhdon shqyrtimi i rastit të vrasjes së Liridona Ademajt.
Dëshminë në këtë seancë e ka dhënë ekspert i neuropsikiatrisë, Bujar Obertinca, i cili ka prezantuar rezultatet e ekspertizës psikiatrike për Granit Plavën.
Obertinca ka deklaruar se i ekzaminuari “gëzon shëndet të plotë mendor dhe veprimet e tij nuk kanë qenë të ndikuara nga ndonjë proces patologjik psikik”.
Gjatë seancës, avokati i Granit Plavës, Skender Gojani, ngriti pyetje të pazakontë lidhur me ditën e ngjarjes.
“Ka pirë kafe shumë dhe ka marrë energji, ditën e ngjarjes ka pirë shumë kafe. A mund të ndikojë? A mund të ketë ndikuar stimulusi i kafesë?
Prokurorja kërkoi të refuzohej kjo pyetje, por gjykatësja tha se lejohet.
Eksperti Obertinca tha: Kafeja bën pjesë në grupin e psiko-stimuluesve dhe ka mundur t’i japë një energji shtesë, por nuk është diçka që mund të ndikojë në aspektin kognitiv në lidhje me veprën.
