Rikthehen në punë 6 zyrtarët policorë e suspenduar në Gjakovë!

6 policët e suspenduar nga puna, janë rikthyer në punë dhe në pozitat që kanë pasur.

Kështu ka deklaruar avokatja Edona Sina, e cila tha se vendimi për suspendim ishte i ngutshëm dhe u bë për shou mediatik, shkruan Demantim News.

Po ashtu, ajo theksoi se audioincizimet ishin prerë, provat ishin të pamjaftuara dhe se hetimi i rastit të policëve ka mundur të hetohej pa i degraduar emrat e tyre dhe pa ua publikuar fotot.

“Në rastin konkret për 6 zyrtarët policorë suspendimi ka qenë i panevojshëm. Hetimi ndaj tyre ka mundur të zhvillohej pa asnjë pengesë, pa publikim të emrave dhe pa ekspozim të panevojshëm publik. Audio e publikuar ishte e prerë, provat nuk ishin të plota. Rasti ndaj tyre ishte i montuar e tendencioz. Ky rast ishte i orkestruar, me instruksione të qarta se si të nxitet situata. Duke mos u mjaftuar me kaq, me javë të tëra nuk u intervistuan, të pakten të dëgjohej edhe versioni i tyre i ngjarjes. Prandaj, nuk duhet të gjykojmë apriori mbi bazën e asaj që publikohet dhe përflitet në rrjete sociale” shkroi ndër tjera Sina.