Një person është arrestuar në Klinë pasi dyshohet se ka kërcënuar një qytetare dhe më pas ka kundërshtuar arrestimin, duke shkaktuar lëndime të lehta trupore te zyrtarët policorë.
Sipas Policisë, rasti ka ndodhur më 8 qershor 2026, rreth orës 23:20, kur Stacioni Policor në Klinë ka pranuar një kërkesë për ndihmë nga një qytetare.
“Zyrtarët policorë kanë reaguar menjëherë dhe nga viktima janë njoftuar se i dyshuari është duke e kërcënuar dhe i njëjti posedon armë me vete”, thuhet në njoftimin e Policisë.
Pas ndërmarrjes së veprimeve të nevojshme policore, i dyshuari është lokalizuar dhe është tentuar arrestimi i tij. Megjithatë, sipas autoriteteve, ai ka refuzuar arrestimin dhe ka bërë rezistencë ndaj policisë.
“Gjatë arrestimit të personit të dyshuar, i cili kishte refuzuar arrestimin, zyrtarët policorë kanë pësuar lëndime të lehta trupore”, njofton Policia e Kosovës.
Pas arrestimit, tek i dyshuari janë gjetur dhe sekuestruar një revole, një karikator dhe nëntë fishekë të kalibrit 9 milimetra.
Policia ka bërë të ditur se i dyshuari ka vazhduar me sjellje kërcënuese edhe pasi është shoqëruar në stacion policor.
“I dyshuari pas arrestimit, në Stacionin Policor në Klinë, ka kanosur zyrtarët policorë”, thuhet më tej në njoftim.
Lidhur me rastin është njoftuar prokurori i shtetit, i cili ka urdhëruar ndalimin e të dyshuarit.
“Me urdhër të prokurorit të shtetit, i dyshuari është dërguar në mbajtje për 48 orë, për veprat penale të lartcekura”, njofton Policia e Kosovës.
Autoritetet nuk kanë bërë të ditur identitetin e personit të arrestuar, ndërsa hetimet për rastin janë në vazhdim.
