Presidenti amerikan, Donald Trump, i ka dhënë grupit militant Hamas në Gazë një afat prej tre deri në katër ditësh që t’i përgjigjet planit të tij për paqe.
Në një konferencë për media me kryeministrin izraelit, Benjamin Netanyahu, të hënën, Trump deklaroi se nëse Hamasi refuzon marrëveshjen, atëherë Izraelit do t’i jepte “mbështetjen e tij të plotë për të bërë atë që do të duhej të bënte”.
Plani i Trump përmban 20 pika dhe parasheh ndër të tjera lirimin e menjëhershëm të të gjitha pengjeve izraelite të mbajtura nga Hamasi.
“Ne thjesht po e presim Hamasin”, tha ai duke folur para gazetarëve në Shtëpinë e Bardhë lidhur me planin 20-pikësh.
Trump paralajmëroi gjithashtu se do të ketë “një fund shumë të trishtueshëm” nëse Hamasi nuk e nënshkruan marrëveshjen.
I pyetur se si mund të duket përgjigjja e Izraelit nëse marrëveshja refuzohet, presidenti amerikan tha se do ta linte Izraelin “të bëjë atë që duhet të bëjë”.
“Me Hamasin, është shumë e thjeshtë”, tha Trump.
“Ne duam që pengjet të kthehen menjëherë dhe duam sjellje të mirë”, shtoi ai.
