Një rast i rëndë i ndodhur në Spitalin e Përgjithshëm të Pejës në dhjetor të vitit 2022 ka rikthyer vëmendjen, pasi familja e një foshnjeje të lindur pa shenja jete ka ngritur padi ndaj Ministrisë së Shëndetësisë dhe këtij institucioni, duke kërkuar kompensim financiar.
Sipas padisë, familja pretendon se trupi i pajetë i foshnjës, pas lindjes, ishte trajtuar në mënyrë të papërshtatshme dhe ishte përfunduar në lavatriçen e spitalit së bashku me çarçafë.
Në dokumentet e siguruara për rastin thuhet se nëna, M.Z., ndodhej në fillim të muajit të nëntë të shtatzënisë kur, më 13 dhjetor 2022, gjatë një kontrolli gjinekologjik u konstatua se fetusi nuk kishte më rrahje zemre.
Pas këtij konstatimi, ajo u dërgua në repartin e obstetrikës në Spitalin e Pejës, ku gjatë mbrëmjes u krye ndërhyrja kirurgjikale dhe u nxor fetusi pa shenja jete.
Avokatja e familjes, Saranda Keqekolla-Sadiku, ka bërë të ditur se për këtë rast pritet të mbahet seancë gjyqësore.
Në padi, si prova përmenden dokumentacioni mjekësor i lëshuar nga Spitali Rajonal i Pejës, si dhe raporti policor lidhur me ngjarjen.
Sipas familjes, kur kishin shkuar në spital për ta marrë trupin e foshnjës për ceremoninë e varrimit, kishin vërejtur vonesa dhe më pas kishin marrë informacion se trupi nuk ishte trajtuar sipas procedurave të pritshme.
Paditësit pretendojnë se foshnja nuk ishte mbështjellë në mënyrën e duhur, por ishte vendosur së bashku me çarçafët që më pas përfunduan në lavatriçe.
Për këtë rast, familja ka kërkuar nga gjykata që Ministria e Shëndetësisë dhe Spitali i Përgjithshëm në Pejë të detyrohen të paguajnë 20 mijë euro si kompensim për dëmin e pretenduar.
Sipas aktakuzës së ngritur nga prokuroria, dy persona janë ngarkuar me veprën penale “Dëmtim i varrezave apo kufomave”, ndërsa në proces janë përfshirë edhe dëshmitarë nga stafi i spitalit dhe një inspektor shëndetësor.
Nga deklarimet e familjarëve të dhëna gjatë hetimeve rezulton se nëna e foshnjës nuk e kishte parë trupin pas lindjes, ndërsa babai ka deklaruar se kishte shkuar në spital për ta marrë trupin për ceremoninë mortore dhe aty ishte njoftuar për situatën.
Sipas deklarimeve të tij, ai kishte përgatitur varrimin pa e ditur se trupi i foshnjës ishte futur në lavatriçe gjatë procesit të bartjes së çarçafëve.
Në kuadër të hetimeve janë marrë deklarata edhe nga punonjës të spitalit, përfshirë personelin e mirëmbajtjes dhe infermierët që kishin qenë të përfshirë në trajtimin e trupit pas lindjes.
Një punëtor i lavanderisë ka deklaruar se gjatë procesit të pastrimit të çarçafëve ishte vërejtur prania e mbetjeve të fetusit, pas së cilës ishte ndaluar makina e larjes.
Ndërkohë, një infermiere ka deklaruar se trupin e pajetë e kishte mbështjellë dhe kishte shënuar emrin e pacientes mbi materialin mbështjellës, para se ta vendoste në hapësirën përkatëse.
Rasti vazhdon të trajtohet në procedurat gjyqësore, ndërsa familja kërkon përgjegjësi dhe kompensim për dëmin e pretenduar.
