Një person është arrestuar në Pejë nën dyshimin se ka shtënë me armë zjarri gjatë një ahengu familjar.
Ngjarja ka ndodhur mbrëmjen e 5 gushtit, rreth orës 23:45, në rrugën “Rexhë Avdija”, pasi Policia e Kosovës kishte pranuar informacion për të shtëna me armë.
Pas pranimit të njoftimit, njësitet policore kanë dalë në vendin e ngjarjes, ku kanë identifikuar të dyshuarin dhe e kanë arrestuar.
Gjatë kontrollit, policia ka konfiskuar një armë të tipit Zoraki, kalibër 9 milimetra, pesë fishekë dhe një karikator.
Me urdhër të prokurorit të shtetit, i dyshuari është intervistuar dhe më pas është liruar në procedurë të rregullt, ndërsa rasti vazhdon të trajtohet nga organet kompetente.
Policia Rajonale e Pejës u ka bërë thirrje qytetarëve që gjatë ahengjeve dhe festimeve të mos përdorin armë zjarri, duke rikujtuar se përdorimi i tyre në kundërshtim me ligjin përbën vepër penale.
Autoritetet kanë theksuar se do të vazhdojnë të ndërmarrin masa ligjore ndaj çdo personi që përdor armë në mënyrë të kundërligjshme.
