Deputeti i zgjedhur i Aleancës, Besnik Tahiri, ka deklaruar se partia e tij do të kontribuojë në procesin e konstituimit të institucioneve të Kosovës.
Para fillimit të seancës konstituive të Kuvendit, Tahiri tha se Aleanca do të marrë pjesë në seancën e sotme, duke theksuar se vendi nuk ka kohë për të humbur me përplasje dhe marrëveshje politike.
Ai vlerësoi se konstituimi i Kuvendit është dashur të ndodhë menjëherë pas certifikimit të rezultateve të zgjedhjeve dhe se vonesat nuk kanë arsyetim.
“Kosova nuk ka as kohë e as energji për t’i humbur me lojëra e pazare politike. Aleanca do të ndihmojë në konstituimin e institucioneve të Kosovës, por njëkohësisht kemi edhe qëndrimin tonë politik”, ka thënë Tahiri.
Ai u ka bërë thirrje deputetëve që të mos e pengojnë funksionimin e institucioneve dhe të mos e mbajnë vendin të bllokuar.
