Kroacia ka marrë vendim për rritjen e pensioneve për veteranët e luftës, si dhe për disa kategori të tjera të autorizuara, një masë që pritet të përfshijë rreth 200 mijë përfitues.
Kryeministri kroat, Andrej Plenković, e bëri të ditur vendimin gjatë një fjalimi në Knin, në kuadër të shënimit të Ditës së Fitores dhe përvjetorit të Operacionit “Stuhia”. Sipas tij, rritja e pensioneve do të ketë një kosto prej rreth 100 milionë eurosh në vit.
Ministri i Çështjeve të Veteranëve, Tomo Medved, prezantoi ndryshimet e propozuara në Ligjin për Veteranët Kroatë dhe Ligjin për të Drejtat e Sigurimit Pensional të Personelit Aktiv Ushtarak dhe Zyrtarëve të Autorizuar.
Ndryshimet parashohin edhe heqjen e uljes së pensioneve për këto kategori, masë e cila ishte zbatuar në vitin 2002.
Sipas të dhënave të publikuara nga autoritetet kroate, ndryshimet ligjore do të përfshijnë gjithsej 210.304 përfitues, që përbëjnë rreth 76 për qind të veteranëve kroatë dhe anëtarëve të familjeve të tyre që aktualisht marrin pensione.
Ligjet e reja pritet të hyjnë në fuqi më 1 janar 2027. Për zbatimin e tyre, në buxhetin e shtetit do të ndahen rreth 88.5 milionë euro shtesë në vit.
