Bashkimi Evropian ka reaguar ndaj deklaratave të presidentit serb, Aleksandar Vuçiq, për mundësinë e ndryshimit të rrjedhës së lumit Ibër, duke vlerësuar se një qasje e tillë nuk kontribuon në normalizimin e marrëdhënieve me Kosovën.
Zëdhënësja e BE-së për çështjet e jashtme, Annita Hipper, tha se deklaratat për ndryshime të mundshme të rrjedhës së lumit dhe veprimet që mund të pasojnë nuk e mbështesin objektivin për një marrëdhënie normale ndërmjet Kosovës dhe Serbisë.
Sipas saj, normalizimi mund të arrihet vetëm përmes dialogut, ndërsa përparimi në dialogun Kosovë-Serbi mbetet një prej kushteve për avancimin e të dyja vendeve drejt Bashkimit Evropian.
Reagimi i BE-së vjen pasi Vuçiq deklaroi se Serbia po shqyrton mundësinë e ndryshimit të rrjedhës së Ibrit dhe se për këtë çështje ka angazhuar ekspertë, duke e lidhur këtë ide me zhvillimet në raport me komunitetin serb në Kosovë.
BE-ja ka përsëritur se dialogu dhe zbatimi i marrëveshjeve të arritura mbeten thelbësore për rrugën evropiane të Kosovës dhe Serbisë.
