Kapiteni Jack Sparrow mund të rikthehet sërish në det, pasi Johnny Depp thuhet se është në bisedime për të reprizuar rolin ikonë në filmin e gjashtë të serisë së famshme “Piratët e Karaibeve”.
Lajmin e ka konfirmuar producenti Jerry Bruckheimer, i cili ka bërë të ditur se aktualisht po zhvillohen diskutime me aktorin për rikthimin e tij në ekskluzivitetin që e bëri Jack Sparrow një prej personazheve më të njohura të kinemasë.
“Po flasim me Johnny Depp, po punojmë për një skenar dhe shpresojmë ta përfundojmë”, ka deklaruar Bruckheimer.
Megjithatë, rikthimi i Depp ende nuk është konfirmuar zyrtarisht, ndërsa informacionet për projektin e ardhshëm janë ende të kufizuara.
Filmi i gjashtë pritet të zgjerojë historinë me personazhe të reja, ndërsa prej disa vitesh është diskutuar edhe mundësia e përfshirjes së aktores Margot Robbie në një projekt të lidhur me universin e “Piratëve të Karaibeve”.
Johnny Depp e interpretoi për herë të parë Kapitenin Jack Sparrow në vitin 2003, në filmin “Mallkimi i Perlës së Zezë”. Performanca e tij e veçantë i dha personazhit një stil dhe identitet të dallueshëm, ndërsa aktori u shpërblye edhe me një nominim për çmimin Oscar për interpretimin e tij.
Kapitulli më i fundit i sagës, “Dead Men Tell No Tales”, u publikua në kinema në vitin 2017.
Pas atij filmi, e ardhmja e Johnny Depp në këtë ekskluzivitet mbeti e paqartë. Marrëdhëniet e aktorit me Disney-n u vështirësuan më tej pas betejave të tij të gjata ligjore.
Në rast se negociatat përfundojnë me marrëveshje, rikthimi i Depp si Jack Sparrow do të përbënte paraqitjen e tij të parë në serinë “Piratët e Karaibeve” pas afro një dekade.
Pesë filmat e parë të kësaj sage kanë rezultuar në një sukses të madh financiar, duke gjeneruar së bashku më shumë se 4.5 miliardë dollarë të ardhura në arkë në mbarë botën.
