Ministri i Mbrojtjes në Shqipëri, Ermal Nufi, ka dhënë një përditësim mbi situatën e zjarreve në disa zona të vendit, duke bërë të ditur se Forcat e Armatosura vijojnë të jenë të angazhuara në terren për përballimin e vatrave aktive.
Sipas Nufit, në Malin e Dajtit në Tiranë po zhvillohet një operacion i gjerë, ku janë angazhuar 50 efektivë të Forcave të Armatosura, të mbështetur edhe nga dy helikopterë të Forcës Ajrore.
Ministri ka bërë të ditur se, pavarësisht situatës, aktualisht nuk paraqitet rrezik për zonat e banuara në Dajt, ndërsa forcat operacionale po vijojnë punën për kontrollimin e situatës dhe shuarjen e zjarrit.
Ndërkohë, ndërhyrjet po vazhdojnë edhe në Lufaj të Mirditës, ku në terren janë angazhuar dy mjete zjarrfikëse të Forcave të Armatosura dhe nëntë efektivë.
Edhe në këtë zonë, sipas të dhënave të bëra publike nga ministri, vatra e zjarrit aktualisht nuk paraqet rrezik për banesat.
Operacionet kundër zjarreve po zhvillohen edhe në Fushë-Lajë të Pukës, ku janë angazhuar 40 efektivë të Forcave të Armatosura.
Sipas përditësimit të situatës, edhe në këtë zonë nuk raportohet rrezik i drejtpërdrejtë për zonat e banuara.
Forcat e Armatosura dhe strukturat e tjera në terren po vijojnë monitorimin dhe ndërhyrjet në zonat e prekura, me qëllim vënien nën kontroll të vatrave të zjarrit dhe mbrojtjen e banorëve dhe pronës.
