Avokati Arianit Koci ka reaguar lidhur me ish-presidentin e Kosovës, Hashim Thaçi, dhe diskutimet e fundit për mundësinë e rikthimit të tij në postin e Presidentit pas përfundimit të procesit gjyqësor.
Përmes një postimi në Facebook, Koci ka shprehur bindjen se Thaçi do të lirohet, por ka sqaruar se edhe një aktgjykim lirues në shkallën e parë nuk do të nënkuptonte domosdoshmërisht përfundimin e çështjes gjyqësore.
“Besoj se Hashim Thaçi do të lirohet. Por, edhe një aktgjykim lirues në shkallë të parë nuk e përfundon domosdoshmërisht procesin. Prokuroria ka të drejtë ankese dhe çështja mund të vazhdojë edhe më tej”, ka shkruar Koci.
Për këtë arsye, avokati e konsideron të parakohshëm diskutimin që Thaçi të rikthehet në postin e Presidentit të Kosovës.
Sipas tij, hapja e kësaj teme në këtë fazë madje mund të jetë e dëmshme për vetë Thaçin.
“Prandaj, me e hapë sot temën e tij për President më duket e parakohshme. Madje, në këtë moment, mundet me qenë e dëmshme edhe për vet Thaçin”, ka deklaruar Koci.
/Demantim News/
