Në Katedralen “Shën Nënë Tereza” në Prishtinë janë hapur sonte zyrtarisht Ditët e Shën Nënë Terezës 2026, manifestimi tradicional kushtuar shenjtores shqiptare.
Programi nisi me Meshën e Shenjtë, pas së cilës u mbajt ceremonia solemne e hapjes. Këtë vit, manifestimi merr një rëndësi të veçantë pasi shënohet 10-vjetori i shenjtërimit të Nënë Terezës, më 4 shtator 2016.
Hapjen e bëri Ipeshkvi i Kosovës, Imzot Dodë Gjergji, ndërsa në ceremoni morën pjesë besimtarë, përfaqësues institucionesh, figura të kulturës dhe qytetarë.
Pjesë e mbrëmjes ishte edhe melodrama “And’rra e Nan’ Terezës – Njerëzorja Hyjnore”, e interpretuar nga aktorja Justina Aliaj.
Manifestimi do të vazhdojë nga 26 gushti deri më 4 shtator, me kremtime fetare, lutje dhe aktivitete kulturore.
Gjatë këtyre ditëve, famulli nga e gjithë Kosova do të udhëtojnë drejt Katedrales në Prishtinë për t’iu bashkuar aktiviteteve kushtuar Nënë Terezës dhe mesazhit të saj për dashurinë, humanizmin dhe ndihmën ndaj njerëzve në nevojë.
