Forcat Detare të Shqipërisë dhe ato të Turqisë kanë zhvilluar një stërvitje të përbashkët në Gjirin e Vlorës dhe në Bazën Detare të Pashalimanit, në kuadër të aktivitetit të NATO-s “Neptune Strike-26”.
Në këtë stërvitje morën pjesë anija shqiptare “Oriku” P-132 dhe grupi i bordingut, ndërsa nga pala turke u angazhuan anijet TCG Anadolu dhe TCG Gaziantep.
Sipas qëllimit të përcaktuar, aktiviteti synoi rritjen e gatishmërisë luftarake dhe përmirësimin e ndërveprueshmërisë ndërmjet dy forcave detare.
Një tjetër objektiv ishte harmonizimi i procedurave operacionale, me qëllim lehtësimin e realizimit të misioneve të përbashkëta në det.
Stërvitjet e këtij lloji synojnë të forcojnë bashkëpunimin ndërmjet vendeve aleate dhe të avancojnë kapacitetet e tyre për përmbushjen e detyrave në kuadër të angazhimeve të NATO-s.
Bashkëpunimi mes forcave detare shqiptare dhe turke vlerësohet si pjesë e përpjekjeve për të rritur koordinimin dhe gatishmërinë në përballimin e sfidave të sigurisë në rajon.
