Partia Demokratike e Kosovës (PDK) i ka kërkuar Presidentes së Kosovës, Justina Shiroka-Pula, që Ligjin për Dhomat e Specializuara dhe Zyrën e Prokurorit të Specializuar ta rikthejë në Kuvend për rishqyrtim.
Kërkesa është paraqitur përmes një letre zyrtare të dërguar më 22 tetor, pas konsultimeve që, sipas PDK-së, kanë pasur për qëllim plotësimin e disa dispozitave dhe rritjen e sigurisë juridike të ligjit.
Sipas kësaj partie, rishqyrtimi synon të adresojë çështjet që mund të pengojnë zbatimin e ligjit, duke qenë se pjesa më e madhe e tij tashmë është përfunduar.
PDK kërkon që ligji të votohet sërish brenda pak javësh
Në reagimin e saj, PDK-ja ka theksuar se rikthimi i ligjit duhet të bëhet në Kuvend dhe jo në Qeveri, duke kundërshtuar mundësinë e nisjes së procesit nga e para.
“Kërkesa është për rikthim në Kuvend, jo në Qeveri apo për nisjen e punës nga e para. Ky proces duhet t’i shërbejë finalizimit dhe hyrjes së ligjit në fuqi, pa vonesa të panevojshme”, thuhet në njoftimin e kësaj partie.
PDK-ja pret që ligji, i miratuar më 6 tetor 2026, të kalojë sërish në Kuvend brenda disa javësh, pas përfshirjes së ndryshimeve të nevojshme.
Partia u ka bërë thirrje edhe ekspertëve, përfshirë Avokatin e Popullit, që të paraqesin propozime konkrete për përmirësimin e dispozitave të tij.
PDK-ja zotohet për mbështetjen e ish-krerëve të UÇK-së
Përveç çështjes së ligjit, PDK-ja ka ritheksuar angazhimin për hartimin e një strategjie të koordinuar shtetërore për fazën e apelit në Hagë.
Kjo, sipas partisë, përfshin sigurimin e fondeve dhe ofrimin e mbështetjes profesionale për mbrojtjen e ish-krerëve të Ushtrisë Çlirimtare të Kosovës që po përballen me proceset gjyqësore në Dhomat e Specializuara.
“Gatishmëria për ta përmirësuar ligjin nuk është në asnjë mënyrë tërheqje prej tij. PDK-ja nuk do të heqë dorë nga hyrja e tij në fuqi assesi”, thuhet në reagim.
Në përfundim, PDK-ja ka bërë të ditur se mbetet prapa nismës së saj ligjore dhe zotimit për të mbështetur ish-krerët e UÇK-së që po gjykohen në Hagë.
