Kryetari i LDK-së, Lumir Abdixhiku, ka deklaruar se partia e tij po vazhdon përpjekjet për të shmangur mundësinë e zgjedhjeve të reja.
Ai tha se gjatë bisedimeve me Lëvizjen Vetëvendosje, LDK-ja po kërkon që të arrihet një balancë demokratike, e cila sipas tij nënkupton edhe përfaqësimin e kësaj partie në institucionet e vendit.
Abdixhiku u shpreh se takimet kanë sjellë afrim në disa çështje, por ende mbetet dallimi kryesor sa i përket balancës demokratike.
“Sa më shumë që takohemi, aq më e mundshme bëhet një zgjidhje. Takimet kanë qenë të mira në aspektin e diskutimeve dhe ka afrime në shumë tema, por ende ekziston një dallim për çështjen kryesore, që është balanca demokratike. Kuvendi i Kosovës duhet të konstituohet dhe nuk ka arsye që kjo të mos ndodhë”, ka thënë Abdixhiku.
Ai ka shtuar se për LDK-në, balanca demokratike nënkupton që partia të ketë përfaqësimin e saj.
