Shumica e adoleshentëve në Mbretërinë e Bashkuar nuk planifikojnë të respektojnë kufizimin e ri për përdorimin e rrjeteve sociale gjatë orëve të natës, i cili pritet të hyjë në fuqi pranverën e ardhshme.
Sipas një sondazhi, rreth 85 për qind e të rinjve të moshës 16 deri në 18 vjeç kanë deklaruar se do ta çaktivizojnë funksionin që bllokon automatikisht qasjen në platformat sociale nga mesnata deri në orën 06:00.
Rreth 45 për qind e të anketuarve thanë se duan të qëndrojnë në kontakt me familjen dhe miqtë gjatë natës, ndërsa të tjerë e përdorin kohën për të parë përmbajtje online. Një pjesë e të rinjve kanë deklaruar gjithashtu se përdorin ose planifikojnë të përdorin VPN për të anashkaluar kufizimet.
Masat janë prezantuar nga qeveria britanike si pjesë e rregullave të reja për sigurinë online. Përveç kufizimit gjatë natës, për përdoruesit 16 dhe 17 vjeç pritet të çaktivizohen automatikisht edhe disa funksione, si lëvizja pa fund në përmbajtje, videot që nisin vetë dhe rekomandimet e personalizuara.
Ekspertët paralajmërojnë se këto masa mund të mos jenë të mjaftueshme për mbrojtjen e të rinjve në internet, pasi shumë prej tyre mund të përpiqen t’i anashkalojnë ose t’i çaktivizojnë kufizimet.
