Këngëtarja e njohur botërore, Britney Spears, ka hyrë vullnetarisht në një qendër rehabilitimi për trajtim nga abuzimi me substanca, ka mësuar TMZ.
Sipas burimeve, ajo është regjistruar në një qendër në Shtetet e Bashkuara disa ditë më parë, pas presionit dhe inkurajimit nga personat e afërt, të cilët e kanë bindur që të kërkojë ndihmë. Në fund, ajo ka pranuar të hyjë në rehabilitim me dëshirën e saj, transmeton Indeksonline.
Një burim është shprehur se këngëtarja “e kupton që ka arritur në fundin e saj” dhe se është e vetëdijshme për situatën në të cilën ndodhet.
Britney Spears prej vitesh ka pasur probleme me substanca të ndryshme, përfshirë edhe përdorimin e Adderall dhe alkoolit. Sipas raportimeve, një pjesë e vendimit të saj lidhet edhe me çështjen e saj ligjore për drejtim të mjetit nën ndikim, ku ajo është arrestuar në mars të vitit 2026 në Ventura County, Kaliforni.
Burime të afërta thonë se edhe familjarët e saj, përfshirë djemtë, e kanë mbështetur këtë vendim dhe shpresojnë që ky hap të sjellë një rikuperim të qëndrueshëm.
Programi i rehabilitimit nuk ka një kohëzgjatje të përcaktuar, por zakonisht zgjat rreth 30 ditë, ndërsa në këtë rast pritet që ajo të qëndrojë më gjatë për një trajtim më të plotë.
Kjo nuk është hera e parë që Britney Spears futet në rehabilitim, pasi në të kaluarën ka provuar disa herë të njëjtin proces, por ka dalë pas një kohe të shkurtër.
