Legjenda e muzikës rock, Bruce Springsteen, ka dhënë një lajm inkurajues për gjendjen shëndetësore të bashkëshortes së tij, Patti Scialfa.
Gjatë një mesazhi të regjistruar për aktivitetin bamirës të çiklizmit Pan-Mass Challenge, i cili mbledh fonde për kërkimet shkencore kundër kancerit, artisti foli për rrugëtimin e familjes së tij në përballjen me sëmundjen.
Springsteen bëri të ditur se Patti Scialfa ka jetuar me mielomë multiple për më shumë se tetë vjet, ndërsa zbuloi se aktualisht ajo ndodhet në fazën e remisionit.
“Patti ka jetuar me mielomën multiple për më shumë se tetë vjet, por tani, fatmirësisht, sëmundja është në remision”, u shpreh ai.
Këngëtari shprehu gjithashtu mirënjohje për mjekët dhe infermierët që kanë qenë pranë familjes së tij gjatë kësaj periudhe, duke vlerësuar përkushtimin e tyre në trajtimin dhe kujdesin ndaj pacientes.
Në fjalimin e tij, Springsteen theksoi se gjithmonë ka besuar te forca e njerëzve të zakonshëm për të bërë ndryshime të mëdha dhe vlerësoi punën e atyre që angazhohen çdo ditë në mbështetje të personave të prekur nga sëmundjet e rënda.
