Çmimet e prodhimit në Kosovë kanë shënuar rritje gjatë tremujorit të dytë të vitit 2026, ndërsa shtrenjtimi është vërejtur edhe te mallrat e importuara. Rritjet më të theksuara janë regjistruar te uji, pijet, letra, produktet minerale dhe disa materiale të lidhura me ndërtimin e industrinë.
Indeksi i Çmimeve të Prodhimit në tremujorin e dytë të vitit 2026 u rrit mesatarisht me 4,6% krahasuar me të njëjtën periudhë të vitit të kaluar. Në raport me tremujorin e parë të këtij viti, rritja ishte 0,9%.
Rritjen më të madhe vjetore e pati sektori i grumbullimit, trajtimit dhe furnizimit me ujë, me 32,2%. Pas tij renditet prodhimi i pijeve, me rritje prej 20,1%, ndërsa prodhimi i letrës dhe produkteve prej saj u shtrenjtua me 14,7%.
Rritje pati edhe në sektorin e prodhimit tjetër me 9,8%, ndërsa produktet e gomës dhe plastikës u rritën me 3,8%. Produktet minerale jometalike shënuan rritje prej 3,3%, ndërsa përpunimi i produkteve ushqimore prej 3,2%.
Çmimet e mobilieve u rritën me 2,6%, makineritë dhe pajisjet me 2,4%, ndërsa energjia elektrike, gazi, avulli dhe furnizimi me ajër të kondicionuar me 2,3%. Të njëjtën rritje prej 2,3% e pati edhe prodhimi i drurit dhe produkteve prej tij.
Në prodhimin e pajisjeve elektrike, si dhe te xeherorët dhe guroret e tjera, çmimet u rritën me 1,9%. Tekstilet dhe produktet kimike patën rritje më të lehtë, prej 0,6%.
Megjithatë, disa industri shënuan ulje. Rënien më të madhe vjetore e regjistroi prodhimi i veshjeve, me 6,4%, ndërsa prodhimi i lëkurës dhe produkteve prej saj u lirua me 2,7%. Ulje pati edhe te produktet metalike të fabrikuara.
Rritje edhe brenda tremujorit
Edhe krahasimi mes tremujorit të parë dhe të dytë të vitit tregon një trend rritës. Prodhimi i pijeve u shtrenjtua me 3,2%, ndërsa prodhimi i mjeteve motorike, rimorkiove dhe gjysmë-rimorkiove me 2,6%.
Metalet patën rritje prej 2,3%, produktet e gomës dhe plastikës prej 2%, ndërsa energjia elektrike, gazi, avulli dhe furnizimi me ajër të kondicionuar u rritën me 1,1%.
Shtrenjtimi prek edhe importet
Presioni mbi çmimet nuk u kufizua vetëm te prodhimi vendor. Në tremujorin e dytë, Indeksi i tërësishëm i Çmimeve të Importit u rrit me 1,4% krahasuar me tremujorin e parë të vitit.
Rritjen më të madhe tremujore e patën artikujt e gurit, llaçit, qeramikës dhe qelqit, me 5,5%. Plastika, kauçuku dhe artikujt prej tyre u shtrenjtuan me 4,8%, ndërsa produktet minerale me 4,7%.
Tekstili dhe artikujt e tekstilit u rritën me 3,6%. Shtazët e gjalla dhe produktet e shtazëve, si dhe druri dhe artikujt prej tij, shënuan rritje prej 1,6%. Produktet e industrive kimike u shtrenjtuan me 1,5%.
Mjetet e transportit patën rritje prej 0,4%, ndërsa artikujt ushqimorë të përgatitur, pijet dhe duhani, si dhe metalet bazë dhe artikujt prej tyre, u rritën me 0,3%. Produktet bimore shënuan rritje prej 0,2%, ndërsa vajrat ushqyese prej 0,1%. Çmimet e këpucëve mbetën të pandryshuara.
Nga ana tjetër, disa kategori të importeve u liruan. Rënien më të madhe tremujore e patën instrumentet optike, fotografike, matëse, medicinale e muzikore dhe mekanizmat e orës, me 3,7%. Letrat dhe artikujt prej tyre u ulën me 1,7%, ndërsa lëkura dhe artikujt e saj me 0,6%.
Pajisjet e makinerisë dhe ato elektrike, së bashku me artikujt e ndryshëm të prodhuar, shënuan rënie prej 0,8%.
Në bazë vjetore, importet në tremujorin e dytë të vitit 2026 ishin mesatarisht 2,6% më të shtrenjta.
Rritjen më të madhe e regjistruan produktet minerale, me 12,7%, të ndjekura nga vajrat ushqyese me 7,7%, këpucët me 5,5% dhe produktet e industrive kimike me 4,1%.
Druri dhe artikujt prej tij u shtrenjtuan me 3,2%, shtazët e gjalla dhe produktet e shtazëve me 3%, ndërsa lëkura dhe artikujt prej saj me 2,6%.
Plastika, kauçuku dhe artikujt e tyre patën rritje prej 2,3%, po aq sa edhe artikujt ushqimorë të përgatitur, pijet dhe duhani. Artikujt e gurit, llaçit, qeramikës dhe qelqit u shtrenjtuan me 1,2%.
Në anën tjetër, produktet bimore u liruan me 5,7% krahasuar me tremujorin e dytë të vitit 2025. Instrumentet optike, fotografike, matëse, medicinale e muzikore dhe mekanizmat e orës ranë me 3,8%, ndërsa metalet bazë dhe artikujt prej tyre me 1,3%.
Letrat dhe artikujt prej tyre u liruan me 1,1%, ndërsa tekstili dhe artikujt e tekstilit me 0,2%.
Në përgjithësi, të dhënat për tremujorin e dytë tregojnë se rritja e kostove është shfaqur si në prodhimin vendor, ashtu edhe te mallrat e importuara. Në tregun vendas, ndikimin më të madh e kanë pasur uji, pijet dhe letra, ndërsa te importet rritjet më të forta janë përqendruar te produktet minerale dhe materialet e përdorura në ndërtim e industri.
