Dogana e Kosovës ka njoftuar se gjatë një kontrolli në Zyrën e Doganës në Prizren janë identifikuar parregullsi në një dërgesë të deklaruar nga një subjekt ekonomik.
Sipas njoftimit në Facebook, zyrtarët doganorë kanë kryer verifikimin e dokumentacionit dhe ekzaminimin fizik të mallrave, duke kontrolluar origjinën, sasinë dhe përshkrimin e tyre.
Gjatë kontrollit janë konstatuar mospërputhje dhe deklarim i pasaktë në emërtimin e mallrave, çka ka rezultuar në një dallim vlere rreth 29 mijë euro.
“Në bazë të këtyre gjetjeve, veprimet përbëjnë kundërvajtje doganore sipas Nenit 244 (pika 1.2) të Kodit Doganor Nr. 08/L‑247 — paraqitje e deklaratës me të dhëna të pasakta ose jo të plota dhe përshkrim të pamjaftueshëm të mallrave.
Dogana e Kosovës vijon procedurat ligjore përkatëse dhe bashkëpunon me autoritetet për zbardhjen dhe ndëshkimin e shkeljeve, me qëllim mbrojtjen e ligjshmërisë dhe të konkurrencës së drejtë në treg”, thuhet në postimin e Doganës.
