Lideri i Reform UK, Nigel Farage, ka propozuar që shtetasit e huaj të dënuar në Britani të vuajnë dënimet jashtë vendit, me qëllim lirimin e mijëra vendeve në burgjet britanike.
Në mesin e vendeve të përmendura si mundësi për marrjen me qira të hapësirave të burgjeve është edhe Kosova, krahas El Salvadorit, Estonisë dhe Lituanisë.
Sipas propozimit, të burgosurit e huaj mund të dërgoheshin në vendin e tyre të origjinës ose në një shtet të tretë, ku Britania do të paguante për hapësirat e burgimit. Pas përfundimit të dënimit, ata do të ktheheshin në vendet e tyre dhe do të ndaloheshin të riktheheshin në Britani.
Ideja lidhet me krizën e mbipopullimit në burgjet e Anglisë dhe Uellsit. Në fund të qershorit, aty ndodheshin mbi 10 mijë shtetas të huaj, që përbënin rreth 12 për qind të të gjithë të burgosurve.
Pse përmendet Kosova?
Një model i tillë tashmë ekziston mes Kosovës dhe Danimarkës. Danimarka ka marrë me qira 300 vende në burgjet e Kosovës për të burgosur të huaj që vuajnë dënime në Danimarkë, në këmbim të një pagese vjetore.
Farage e sheh këtë lloj marrëveshjeje si një mënyrë për t’i liruar Britanisë kapacitetet e burgjeve dhe për të shmangur lirimin e parakohshëm të të dënuarve të rrezikshëm.
Megjithatë, qeveria britanike e ka kundërshtuar planin, duke e cilësuar jo si një zgjidhje serioze dhe duke paralajmëruar se marrëveshje të tilla do të kërkonin vite për t’u realizuar.
